ليلة العيد في نابلس
عدد القراءات: 3166

فواز لبادة

احلى اشي في العيد هو اخر تلات ايام برمضان....هاي النتيجه توصلتلها بعد طول عناء.............. عجقه العيد هي الحلوه ........شراء الملابس واللف بالشوارع لبعد نص الليل ولفلفه على دوار و الخان طبعا مش عشان الواحد يشتري ...بس نوع من التقليد السنوي ..سهر ..وترمس.... وبليلها.... وسندويشات فلافل....وتطقيس عالبنات....ليله حلوه عن جد ...والتحضير للعيد هو الاحلى ..بتبدأ النسوان تعزيل في البيوت وتنظيف وغسل كل اشي ...حتى انه في نسوان بتطلع الملابس المغسوله وبتغسلها كمان مره قال احسن ما يحكوا عنها (مره خامه) يعني ست بيت مش معدلة ولازم تشتري فسيخ عشان تفسخ صيامك كنا واحنا زغار نفكر انه اذا ما افطرنا اول يوم العيد فسيخ فلازم نضل صايمين ...لانه الشغله الوحيده اللي بتفسخك عن رمضان هي الفسيخ واهم اشي بالعيد هو المعمول (الكعك)...وبدونه ما بزبط العيد...احنا او عيلتنا ما بنشتري كعك جاهزوبنعتبر اللي بشتري جاهز شخص فاشل مطبخيا......لازم تشتري سميد ناعم وسمنه الغزال ومحلب وشومر وكلفه المعمول وتعمله بالبيت بطقوس اقرب الى الطقوس الدينيه واهم اشي هو انك تبس السميد مع السمنه وكلمه تبس معناها تخلطه كويس مع الضغط عشان يصير روح واحده ما بعرف اذا الفعل بس يبس بسا موجود باللغه العربيه وتبدا بعد ذلك مرحله التدوير والتكوير والقوالب و نقش و لي بزيد من عجينة المعمول بنعملو فتوت و بعديها بيبلش الشوي والتحمير بالفرن وبتصير تشم الروائح اللي بتشهي ممممممممممممممممممممم  شو طيبه ..يا حبيبي ويا ويلها اللي بطلع كعكها يابس او بهرهر و بفرط بأيد ضيوف .بفضحوها جاراتها و لي بيجو عندها بلعيد وبتهموها بعدم بس السميد جيدا

كنا زمان ننشد نشيد قبل ليله العيد وهو :

بكره العيد وبنعيد....وبندبح بقره السيد

والسيد ماله بقره.....بندبح بنته هالشقرا

والشقرا ما فيها دم...... بندبح بنته بنت العم

هونا مقص وهونا مقص....عنا عرايس ترقص بس

انا لهلاء بنشدها بس بحشش من الضحك و انا بغنيها، مش عارف ليش كنا مصرين انا ندبح بقره السيد وبنته....وبطلت اسمع اطفال اليوم بنشدوها الظاهر انها صارت من التهم الارهابيه ايضا لانه فيها دبح للسيد هاي هي ليله العيد لمعظم الناس في نابلس وبعتذر اذا في ناس ما فهموا شويه مصطلحات نابلسية من كلامي.


وكل عام وانتم جميعا بالف الف خير

مع تحياتي

أضف تعليق
تغيير الصورة
تعليقات الزوار

1

محمد الشرفا، الاردن اربد
ليلةالعيد انستينا و نورتينا \\\ يا ريتني بقدر ادخل الضفه واعيد معكم

2

أبو باسل، نابلس - الرياض
أيام العيد من أجمل الأيام في السنة وليلة العيد من أجمل الليالي وصباح العيد من أجمل الأوقات كنا نترك الطبيخ واللحوم ونذهب للمطعم لنأكل الحمص والفول والفلافل وبعدها السينما حفلة الصباح وبعدها المنتزة بوادي التفاح يا سلام على هديك الأيام

3

AMIRA25، هوندا
الله على زكرياة نابلس زكرتني في ايام زمان كن الحوب التقاليد حلاو اليوم الاخ بيدبح اخوى تمان الشعبي السلام

4

بسام أبو فريدي، نابلس
احلى شي بالعيد العيدية واحنا زغار وكبرنا والعيديه بتكبر ، كنا صغر ونتعيد صرنا كبار وااااااخ منعيد معليش اختي واختك بستاهلوها يا رب نرجع صغار وعالباب نعيد ، او نصير كبار واولادنا عالباب تعيد

5

مامون، نابلس
احلى مدينة في العالم نابلس ... العيد في نابلس شي حلوووو وانشاء الله بنعاد على المسلمين واهل نابلس الحلوين بالخير يا رب

6

momo، nablus
a7la nablus wallah nablusyeeh o aft5r ^_^

7

moshata2a، nederlands
wooooooooow sho ishta2et la nables o la ahel nables o la re7et nables... wallah 3amar ya nables

8

عامر شملاوي، لبنان
كل عام والجميع ابخير

9

كرم مقالده، فلسطين
نال اعجابي

10

ياسمين، فلسطين
عجبني كلامك انا كنت عايش بنابلس بس انتقلت على الخليل وانا طبعا بعرف عادات وتقاليد نابلس لاني عشت معاها 8سنين بس انا مستحيل انسى نابلس وشكرا لكمممممممممممممم

11

نابلس، فلسطين
أحلى شي في العيد بنابلس اجتماع الأخوة والأب علشان يلفوا على العمات والأخوات ونسوان العم والخالات ويعيدوهم او بالأحرى يعطونهم فلوس عيديه أحلى عيد بنابلس

12

حمدي، فلسطين
ايام العيد اجمل ايام السنة
تصميم وتطوير: ماسترويب